Impuguke zo mu bihugu bigize Umuryango w’Afurika y’Iburasirazuba(EAC) ziri kwiga uko ibicuruzwa by’ibinyampeke bigengwa n’amabwiriza amwe y’ubuziranenge mu karere, bikoroshya ubucuruzi bwabyo.

Izo mpuguke zireba iby’ubuziranenge zateraniye mu nama y’iminsi itatu i Kigali, kuva kuwa 28 Gashyantare 2017, ziga ku mabwirizwa y’ubuziranenge mu icuruzwa ry’ibigori, ifu yabyo, ingano n’ifu yayo, ifu y’uburo, ifu y’amasaka, umuceri hakiyongeraho ibishyimbo na soya.

Iyi nama ije ikurikira iyabereye iMombasa muri Kenya muri Gashyantare 2016, yateguwe n’Ikigo kitegamiye kuri leta cyita ku binyampeke muri EAC (EAGC).

Umuyobozi mukuru wa EAGC, Gérad Makau Masila, yavuze ko hakenewe ko ibihugu bigize EAC bigomba guhuza amabwiriza y’ubuziranenge bw’ibinyampeke kugira ngo byihutishe iterambere ry’ubucuruzi bwabyo mu karere.

Byitezwe ko iyi nama izarangira hagiyeho amabwiriza rusange agenga ubuziranenge muri EAC, ku buryo niba hari kawunga iturutse muri Uganda itagera mu Rwanda ngo inengwe kandi aho ituruka nta kibazo yari ifite cy’ubuziranenge.

Mukunzi Antoine wari uhagarariye Umuyobozi mukuru w’Ikigo cy’ubuziranenge mu Rwanda mu itangizwa ry’iyi nama i Kigali, yishimiye ibikorwa by’izi mpuguke, avuga ko bizanateza imbere abahinzi n’abacuruzi b’aka karere, hakanacuruzwa ibidashobora kugira ingaruka ku buzima bw’abantu.

Ati “Mikorobe (Microbe) yitwa Aflatoxin iribwa mu binyampeke bitujuje ubuziranenge izirindwa burundu.”

Uhagarariye Umunyamabanga Mukuru wa EAC, Willy Musinguzi, na we yishimiye ko iyi nama izarangira hakozwe amabwiriza y’ubuziranenge y’ibinyampeke, bikazazana umwuka mushya mu bucuruzi bwambukiranya imipaka.

Uretse iby’ubuziranenge, Umuyobozi Mukuru wa EAGC, Gerad Macau Masila, yerekanye ko uyu muryango ufite intego yo guteza imbere abahinzi, ati “Tugamije gufasha abikorera gutera imbere. Turebera hafi abacuruzi b’ibinyampeke n’abahinzi babyo. Dufasha ba rwiyemezamirimo mu binyampeke bari mu nzira yo gutangira imishinga yabo. Uretse ibihugu bitandatu bigize EAC turi no muri Ethiopia, Congo Kinshasa, Somalia na Malawi.”

 

171 Views

Kwamamaza

Sponsored Content