Irwanda

Imyenda yatumye Umwalimu SACCO igabanya kabiri inguzanyo yatangaga







Ubu abarimu bashobora kwaka inguzanyo itarengeje miliyoni 35 muri Koperative yabo yo kwizigamira, Umwalimu SACCO kuko ngo yibasiwe bikomeye n’ikibazo cy’imyenda.


Mu mpera z’icyumweru gishize ubwo hateranaga inama rusange y’abanyamuryango ba Koperative Umwalimu SACCO, nibwo hatangajwe ko hari ingamba zafashwe kugira ngo iyi koperative itazafunga imiryango mu gihe kizaza.

Umuyobozi Mukuru w’Umwalimu SACCO, Uwambaje Laurence avuga ko iki cyemezo cyo kuvana inguzanyo kuri miliyoni 70 z’Amafaranga y’u Rwanda ikagera kuri miliyoni 35, cyafashwe nyuma yo gusanga ko koperative iberewemo imyenda myinshi.


Uwambaje avuga ko nubwo koperative yashyizweho igamije guhindura imibereho y’abarimu, ntabwo ngo yakwemera guhomba amafaranga menshi kubera abarimu bamwe batoroka nyuma yo kubona inguzanyo.

Iyi koperative ifite abanyamuryango 73,553 benshi muri bo bakaba ari abarimu babigize umwuga.

Uwambaje aragira ati “Kwemerera abantu inguzanyo byabaye ingorane. Ntabwo twakwizera ko koperative izagaruza amafaranga yatswe nk’inguzanyo kuko hari n’ubwo abarimu bayasabye basezera akazi cyangwa se bakirukanwa mbere y’uko barangiza kwishyura.”


Izi mpinduka zo muri koperative Umwalimu SACCO kandi zahinduye igihe cyo kwishyura kiva ku myaka 15 kigera ku 10.

Abarimu bahamagariwe kwitonda mu gihe bashyira umukono ku masezerano ngo bishingire bagenzi babo mu rwego rwo kwirinda kubibazwa mu gihe uwatse inguzanyo yaburiwe irengero.


Raporo yagaragajwe muri iyi nama rusange ya Koperative Umwakimu SACCO igaragaza ko koperative yatanze inguzanyo 1 052 066 zihwanye na miliyari 150 z’amafaranga y’u Rwanda.

Asaga miliyari 46 z’amafaranga y’u Rwanda ngo ntaragaruzwa n’iyi koperative.


Abari muri iyi nama bemeranyijwe kugaruza aya mafaranga mu buryo bwose bushoboka mu rwego rwo kwirinda igihombo ku banyamuryango bose muri rusange.

Mpozembizi Florent uhagarariye abanyamuryango b’iyi koperative bo mu Murenge wa Kavumu ho mu Karere ka Ngororero yagize ati “Aya mafaranga agomba kugaruzwa mu buryo bwose bushoboka ngo ubukungu bw’abagize koperative ntibuhungabane. Mu gihe kiri imbere ubusabe bw’inguzanyo bugomba kujya bwiganwa ubushishozi buhambaye ngo harebwe ubushobozi bw’uwatse inguzanyu.”


Ingengo y’imari nshya


Inama rusange ya Koperative Umwalimu SACCO yemeje ingengo y’imari nshya y’umwaka wa 2017 ingana na miliyari 40.1 z’amafaranga y’u Rwanda, yagabanutse ugereranyije na miliyari 52.9 z’amafaranga y’u Rwanda mu mwaka ushize.

Muri iyi ngengo y’imari ngo asaga miliyari 33.2 z’amafaranga y’u Rwanda ni yo azatangwa nk’inguzanyo ku banyamuryango, naho koperative igateganya inyungu ya miliyari 2.9 ugereranyije na miliyari 2.5 imaze kunguka uyu mwaka.

 




206 Views

Kwamamaza

Sponsored Content

Tip! #RW

Julia Mukankusi and we others DotRW offering Web Hosting, VPS, Domain Name, Premium SEO, link building, web development and AdWords. Learn more about our services .

IBITEKEREZO

TANGA IGITEKEREZO

AMAZINA
E-MAIL
ANDIKA ICYO UTEKEREZA KURI IYI NKURU


#Amakuru #Hanze #Imikino #PaulKagame

Sponsored Content